Acara Seren-Sumeren

    • Acara SEREN-SUMEREN. Acara ieu lumangsung nalika calon panganten pameget diserenkeun ka pihak calon panganten istri, kanggo didahupkeun/ditikahkeun. Ditampi pihak calon panganten istri. Ieu nambihan rumpaka sawer> Buka Pintu, gaya Sekaran Dalang.

      SAWÉR PANGANTÉN

      RENGGAN SEBRAKAN – (Saur Nira):

      Ka Allah abdi nyalindung
      Tina kakejeman syétan
      Nu nambalang ka Pangéran
      Ka Allah abdi nyalindung
      Tina kakejeman syétan
      Nu nambalang ka Pangéran
      Kalayan Asma-Na Allah
      Maha Welas – Maha Asih
      Sembaheun urang sadaya
      Sakur mahluk nu kumelip
      Nyatana jin jeung manusa

      (Bétét Ijo):

      Kuring yakin
      Teu aya deui Pangéran nu wajib dipunjung
      Anging Nu Maha Agung
      Allah Nu Maha Linuhung
      Kalayan sim kuring yakin
      Yén Kangjeng Nabi Muhammad
      Utusan Nu Maha Héman
      Rasulullah pangahirna
      Nu nyandak berkah tur rohmah
      Pikeun sadaya alam

      (Sendonan):
      Nalungtik jaman bihari
      Nyungsi warti para wali
      Nu dipamrih répéh-rapih, jaler-istri
      Tradisi jadi talari
      Nyukrih hidayah ilahi
      Sangkan hirup sugih mukti, tur walagri
      Surahaneun, lenyepaneun, picontoeun, pieunteungeun
      Guareun pikahareupeun, larapkeun sarta amalkeun
      Malahmandar diperengkeun
      Muka lawang pimulangeun.

      JANGKRIK (Nyorog):

      Éling-éling masing éling
      Ka nu ngaping beurang peuting
      Éling-éling masing éling
      Ka Gusti Nu Maha Wening.

      KIDUNG:

      Jodo paparin Hyang Manon
      Geuning teu burung kalakon
      Sing gugon kana papagon
      Ibadah sing soson-soson
      Silih takon-silih walon
      Poma tong kadalon-dalon
      Sangkan teu kenging bebendon
      Tong ingkar tina tetekon.

      ………. téh wujudna istri
      ……. wujudna lalaki
      Kiwari jadi ngahiji
      Pikeun ngolah laki-rabi
      Ngajalankeun Sunah Nabi
      Méh jadi insan sajati
      Tinemu hidayah Gusti
      Nyangking katingtriman ati

      Ieu kidung ngalanglaung
      Binarung pidu’a indung
      Nya indung anu ngakandung
      Ku hidep kudu dipunjung
      Sabab kanyaahna luhung
      Luhur batan awang-uwung
      Taya waktu nu kalarung
      Dugi ka dirurub padung

      Bapa mah anu ngayuga
      Anu mayungan lir méga
      Tur salawasna sayaga
      Kana pancén nu kaduga
      Ku hidep kudu dijaga
      Raksa duduga prayoga
      Sangkan pinanggih jamuga
      Dibukakeun lawang sorga

      Indung-bapa nu mihéman
      Nu jadi cukang lantaran
      Réngsé tina kawajiban
      Sabab hidep geus rimbitan
      Tutas mangsa lalagasan
      Taya gunung pananggeuhan
      Sing bisa hirup duaan
      Sabobot saspihanéan

      Ayeuna hidep kurenan
      Omat lali paniatan
      Milari rido Pangéran
      Sangkan kenging kani’matan
      Mung kedah ditarékahan
      Hirup kumbuh sauyunan
      Mun hilap silih élingan
      Tangtu Allah mikahéman

      Ari kawajiban istri
      Bakti diri ka salaki
      Surti kalayan gumati
      Nastiti tur amis budi
      Masing jeujeuh kana rizki
      Ngeureut neundeun sangkan mahi
      Ngan pacuan ulah lali
      Muji ka Nu Maha Suci

      Najan salaki kawasa
      Omat ulah kumawasa
      Komo mun resep mirusa
      Wani nyiksa tur mergasa
      Mun aya nu teu mirasa
      Ebréhkeun cukup ku basa
      Malar sang bojo rumasa
      Tangtu moal jadi dosa

      Ka tatangga sing soméah
      Handap asor léah manah
      Laku-lampah sing merenah
      Tangtu hirup tumaninah
      Lamun pinanggih tugenah
      Pasrah ka Nu Maha Murah
      Mun manah kenging kabingah
      Lisankeun alhamdulillah

      Sangkan maksud tinekanan
      Ulah ngukut panasbaran
      Teu kaopan teu payaan
      Eta bibit pacéngkadan
      Sing bisa hirup basajan
      Disarengan kasadaran
      Kasabaran, kaihlasan
      Tumamprak kadar Pangéran

      Kasugri ka para wargi
      Urang ngadu’a ka Gusti
      Muga-muga, mugi-mugi
      Keur pangantén jaler-istri
      Laki-rabina walagri
      Beunghar harta, sugih harti
      Kiat nandangan balai
      Sing salamet lahir-batin
      Pamungkas:

      Amin Ya Robbal ‘Alamin
      Ya Allah Robbil izzati

      BUKA PINTU

      Pi: (Greget Saut)
      Saha éta, kumawani?
      Ngetrok panto, tarik pisan
      Ĕstu taya kasopanan
      Boa goréng papaniatan
      Rék ngaganggu katengtreman
      Ka kuring nu geus rimbitan.

      Pa: (Laratangis)
      Teungteuingeun
      Buah haté kembang soca
      Sulaya tina sangkaan
      Harianeun
      Nu geulis jimat awaking
      Naha téga-téga teuing
      Teu kersa muka pipinding
      Engkang …….., carogé ………..
      Anu nembé dirapalan
      Ku hukum Agama Islam

      Pi: (Udan Iris)
      Hapunten anu kasuhun
      Manawi téh sanés Engkang
      Duh, Sang Panutan
      Pintu dibuka
      Koncina Taudz – Basmalah
      Miwah kalimah Syahadat

      Pa: (Paniba)
      Mangga, dangukeun!
      Mangga, dangukeun!
      Mangga, dangukeun!

      Lisankeun ku Pangantén Pameget:
      TA’UDZ – BASMALLAH – SYAHADAT!

About these ads

About Uwa Lengser

User

Posted on October 22, 2011, in Kelengkapan Upacara Adat. Bookmark the permalink. 2 Comments.

  1. Assalamu’alaikum wr wb. Kang hatur nhun katampi pisan piwejangna, ngalangkungan kidung hate asa tingsereset. mudah2an kanggo saterasna Nadoman kanggo pangeling2 ngaronjatkeun ibadah. mudah2an janten barokah

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Follow

Get every new post delivered to your Inbox.

%d bloggers like this: